Superogʻir vazn toifasida WBC, WBA va IBF kamarlari sohibi Aleksandr Usikning navbatdagi raqibi kim boʻlishi deyarli oydinlashdi. Ukrainalik chempionning menejeri Egis Klimasning soʻzlariga koʻra, Usik navbatdagi jangini amerikalik kuchli bokschi, sobiq jahon chempioni Deontey Uaylderga qarshi oʻtkazishi kutilmoqda.
Mazkur ulkan toʻqnashuv 2026 yilning aprelь oyi oxiri yoki may oyi boshiga rejalashtirilgan. Klimasning taʼkidlashicha, ayni paytda Uaylder jamoasi bilan muzokaralar faol bosqichda davom etmoqda. Jang joyi sifatida AQShning Las-Vegas yoki Los-Anjeles shaharlari koʻrib chiqilmoqda. Bu Usik uchun Amerika ringlaridagi navbatdagi muhim imtihon boʻladi.
“Uaylder — Aleksandr hali ringda toʻqnash kelmagan eng xavfli va mashhur bokschilardan biri. U hali ham ajoyib formada va uning zarba kuchi har qanday raqib uchun katta xavf tugʻdiradi,” — deydi Egis Klimas. Shuningdek, menejer Usikning faoliyatini yakunlash niyati yoʻqligini va ushbu jangdan keyin yana bir nechta katta bahslarda ishtirok etishni rejalashtirayotganini qoʻshimcha qildi.
Boks olami uchun Usikning texnik mahorati va Uaylderning dahshatli nokaut qiluvchi zarbasi oʻrtasidagi bahs yilning eng qiziqarli voqealaridan biri boʻlishi shubhasiz. Muxlislar hozirda rasmiy kelishuv tasdiqlanishini intizorlik bilan kutishmoqda. Ushbu jang superogʻir vazn toifasidagi kuchlar nisbatini yana bir bor belgilab berishi kutilmoqda.