Ҳиндистоннинг Модинагар шаҳрида оғир атлетика бўйича ўтказилган турнир ташкилотчилари спортчиларнинг оммавий равишда иштирок этишдан бош тортгани сабабли бир қатор вазн тоифаларидаги мусобақаларни бекор қилишга мажбур бўлди. Бу ҳақда Амар Ужала нашри хабар берди.
Манбага кўра, спортчилар турнирга допинг-офицерлар келишини билишмаган ва улар пайдо бўлганидан кейин 252 нафар эркакдан 126 нафари ва 177 нафар аёлдан 93 нафари мусобақадан қочиб кетган. Турнирда жами 429 нафар спортчи иштирок этиши керак эди.
Юқоридаги сабаб туфайли, айрим вазн тоифалари умуман ўтмаган ёки бир-икки нафар спортчи иштирокида бўлиб ўтган.
Маълум қилинишича, Ҳиндистонда бундай даражадаги мунтазам чемпионатларда одатда допинг назорати ўтказилмаган. Допинг комиссиясининг келгани ҳақидаги хабар мусобақа иштирокчиларини ҳайратда қолдирган.
