ПФЛ тақвимига кўра, яқиндагина танаффусга чиққан Суперлига 27 июлдаёқ қайта йўлга тушади. шундай экан, миллий чемпионатнинг биринчи ярмида қайд этилган статистик кўрсаткичларни тўлиқ таҳлил қилишга вақт кам. Лекин энг асосий кўрсаткичларга эътибор қаратиш имкони бор, албатта.
ЗАРБАЛАР ТАҲЛИЛИ
152та зарба - бу Суперлига биринчи даврасини атиги 10-ўринда якунлаган «Сўғдиёна» натижаси. Ҳа, ишлари унча юришмаётган Жиззах жамоасида зарбалар етарли, фақат аниқлик паст. Жамоада шунинг ҳисобига голллар анча кам (14та). 23та гол билан чемпионатнинг энг маҳсулдор 2та иштирокчисидан бири бўлиб турган «Навбаҳор» зарбалар сони бўйича 2-ўринда - 143та. Ортда қолган 13та ўйинда худди пешқадам каби 23та гол ҳосил қилган ОКМКда зарбалар сони 1та кам (142та). Шундан хулоса чиқариш мумкинки, «Навбаҳор» ва ОКМКда ҳужум ҳаракати жойида. Зарбалар бўйича энг паст кўрсаткич «Олимпик» (94та) ва «Сурхон» (83та)да.
АНИҚ ЗАРБАЛАР ТАҲЛИЛИ
Энг кўп зарба йўллаган «Сўғдиёна» уларнинг аниқлиги бўйича 3-яхши статистикага эга - 61та. Бу борада ОКМК энг яхши кўрсаткичга эга: 69та аниқ зарба. «Навбаҳор» вакилларининг эса 63та уринишлари аниқ чиққан. Қанчалик ғалати туюлмасин, зарбалар аниқлиги бўйича энг паст натижа «Олимпик»ка тегишли - 38та. Муҳими, Темур Кападзе шогирдлари шунча зарбадан 12та гол уришди. Аутсайдер - «Турон»нинг атиги 7та гол ургани аниқ зарбалар камлиги билан изоҳланади - 41та. 6тагина гол билан кифояланиб турган «Бухоро» ҳақида ҳам худди шу гап. Улуғбек Бақоев шогирдларининг 40та уринишларидагина тўп рақиб дарвозасига борган.
БУРЧАК ЗАРБАЛАРИ ТАҲЛИЛИ
Ўйиннинг асосий элементларидан бири ҳисобланган корнер статистикасига қарасак, ОКМК ва «Бухоро» тенг натижа билан етакчи - 75тадан бурчак зарба. «Насаф»да ҳам корнерлар сони кам эмас - 73тани ташкил этади. Бурчак тўпи масаласида ортиқча мақтанолмайдиган «Қизилқум» футболчилари бурчак байроқчаси олдидан 31 мартагина «стандарт» ижро этишган ва бу Суперлигадаги энг паст натижа. «Бунёдкор» ҳисобида эса атиги 35та бурчак зарбаси бор.
Энг кўп сариқ карточка
«Олимпик» - 33та
«Бунёдкор» - 31та
Энг кам сариқ карточка
«Сурхон» - 20та
«Насаф» - 22та
Энг кўп қизил карточка
«Қизилқум» - 7та
«Металлург» - 5та
«Андижон» - 4та
Қизил карточка олмаган клублар
«Бунёдкор»
«Сўғдиёна»
ПФЛ маълумотлари асосида тайёрланди, Мухтасар Умарова тасвири
