Албатта, тартибли ўйин, аниқликка йўғрилган тактик чизма ва кучли шижоат ҳисобига! Бунда табиийки, жамоа бош мураббийи Эрве Ренарнинг роли катта. Мана, франциялик мутахассис ўша ўйин танаффусида шогирдларига қандай туртки бергани акс этган видеолавҳа ижтимоий тармоқларга чиқди ва энди кўпчилик араб жамоасининг сенсацион ғалабасини шу оташин гапларга ҳам боғламоқда.
Саудия Арабистони термаси бош мураббийи драматик тус олган учрашув танаффусида чиндан ҳам бор вужуди билан гапириш асносида шогирдлари руҳиятига катта таъсир кўрсатган. Мана, оташин нутқнинг қисқача мазмуни: «Йигитлар, сизларни жуда яхши кўраман! Фақат Салмон бундан мустасно. У бу борада шикоят қилаверсин бемалол. Ўзи бу ерда нима қиляпмиз? Шу ҳам прессингми? Прессинг шунчаки, олдинга боришни англатмайди. Месси майдон марказида тезлик олганида, уни шунчаки, кузатиб турдингиз. Ваҳоланки, қаршисига чиқишингиз, кутиб олишингиз керак. Истасангиз, телефонни олиб, Лео билан суратга ҳам тушиб олинг. Ҳимояда турибсиз, у эса барчани алдаганча ўтиб кетмоқда. Мана, гол қўйиб юбордик. Нима қилганингизни кўрдингизми? «Камбэк»нинг иложи борлигини сезмаяпсизми? Бунга ишонмаяпсизми? Рақиб бўш ҳаракатланмоқда ахир.
Олға йигитлар, олға! Жанг бошлаш вақти келди! Борингизни беринг. Ўйин бошланиши билан қотиб қолдингиз. Ўзингизни тезда қўлга олинг, босиқроқ бўлиш керак. Жангга қайтиш керак. Шарт!»
Амалда шу оташин гаплар таъсир қилдими, саудлар иккинчи бўлимда дадилроқ ҳаракатланиб, Лео Месси ва унинг дўстларини уялтириш уддасидан чиқишди. Ҳа, футболда мураббийнинг роли беқиёс. Жумладан, жамоани «уйғотиш» масаласида ҳам.
Биласиз, Аргентина термаси устидан қозонилган ғалабадан кейин Саудияда чинакам футбол байрами бошланиб кетди. Хусусан, қўшимча 1 кунлик дам олиш эълон қилинди, ҳар бир футболчига 2,5 миллион доллар миқдорида мукофот пули ажратилди. Энди Қироллик валиаҳд шаҳзодасининг шахсан ўзи жамоанинг ҳар бир вакилини Rolls-Royce автомобили билан сийлашга қарор қилди.
Факт. Саудия Арабистони миллий жамоаси Аргентина термасининг 36та ўйинга чўзилган мағлубиятсиз сериясини узиб қўйди. Қойил!
Аргентина термасига қарши кечган ўйинда дарвозабон Муҳаммад ал Овайс билан тўқнашиб кетиши натижасида жароҳатланган Саудия Арабистони миллий жамоаси ҳимоячиси Ёсир ал Шаҳроний Ар-Риёдда жарроҳлик столига ётди ва амалиёт муваффақиятли ўтди. Саудия термаси матбуот хизматининг хабар беришича, мамлакат шарафини 73та ўйинда ҳимоя қилган «Ал-Ҳилол» футболчиси ҳозирча шифокорлар назоратида. Олдинроқ унинг тиши ва жағи сингани, лаби ёрилгани айтилганди.
ЭВРЕ РЕНАРНИНГ АСОСИЙ КАРОМАТЛАРИ
Замбия термасини Африка Миллатлар кубогида ғалаба сари етаклади
Кот-д~Ивуар термасини Африка Миллатлар кубогида ғалаба сари етаклади
Саудия Арабистони термаси билан ЖЧда Аргентина миллий жамоасини мағлубият домига тортди
