Бу ҳақдаги хабарни Ар-Риёд клуби матбуот хизмати ҳам тасдиқлади. Эслатма, ЖЧ-2022га клубсиз футболчи мақомида йўл олган Криш Қатарда хафагарчиликка юз тутди. Ҳа, у ўз ҳисобига навбатдаги голни ёзиб қўйиб, нақ 5та мундиалда рақиб дарвозасига йўл топган тарихдаги биринчи футболчи бўлди. Аммо шуниси борки, Португалия термаси бош мураббийи Фернанду Сантуш «плей-офф» раундлари ўйинларида Роналдуни бошланғич таркибга киритгани йўқ, боз устига, унинг жамоаси чорак финалда Марокаш термасига бас келолмай, ортга қайтди. Шундан кейин Криштианунинг фаолиятини Саудия Арабистонида давом эттириши деярли ойдинлашиб қолганди.
Ҳа, клуб футболида «Спортинг» - «МЮ» - «Реал» - «Ювентус» - «МЮ» йўналиши бўйича ҳаракатланган Криштиану Роналдунинг ўзи охиригача ЕЧЛда иштирок этувчи жамоалардан бирига ўтишни кўпроқ хоҳлади, гўё. Лекин унинг молиявий шартларини бажарадиган клуб топилмади, чоғи. Шу тариқа бутун фаолияти мобайнида еврофутболни янада ёрқинлаштирган чин голеадор Осиёга юзланди ахийри. CBC Sport хабарида айтилишича, 37 ёшли футболчи «Ал-Наср» билан 2 йиллик шартнома тузди. Диққат қилинг, у Саудияда йилига 75 миллион доллар олади. Умуман, футболчининг жами йиллик даромади 200 «лимон»га етиши айтилмоқда. Роналду аллақачон тиббий кўрикнинг асосий қисмидан ўтишга улгурди. Эслатма, ҳужумчи 2022 йилнинг 22 ноябрь куни эркин агентга айланган эди. Аниқроғи, Криштиану журналист Пирс Морганга шов-шувли интервью берганидан сўнг «МЮ» ундан воз кечди батамом. Криш бунга қадар жорий мавсум «қизил иблислар» сафида жами 16 марта майдонга тушиб, 3та гол ва 2та самарали узатма муаллифига айланганди. Португалиялик битимга имзо чекканидан кейин одатий фикр билдириш билан чекланди: «Бошқа мамлакат, мутлақо янги лигада ўзимни синаб кўриш лаҳзаларини интиқ ҳолда кутаман. «Ал-Наср»нинг умумий қараши илҳомлантирди. Энди жамоанинг катта муваффақиятлари йўлида ишлашга тайёрман, янги шериклар даврасига қўшилганимдан хурсандман».
Криштиану Роналду ва Лионель Месси рақобатининг персонал тарафдорларига хушхабар: икки буюк тўпурар январдаёқ майдонда яна ўзаро тўқнаш келиши мумкин. Журналист Абдул Булм хабарига қараганда, «ПСЖ» январь ойида Саудия Арабистони бўйлаб сафарга чиқади ва 2та ўртоқлик учрашувидап майдонга тушади. Кристоф Галтье жамоасига жумладан, маҳаллий «Ал-Ҳилол» ва «Ал-Наср» клублари термаси (қўшма таркиби) рақиблик қилади. Катта эҳтимолки, Лионель Месси ҳам 19 январга мўлжалланаётган баҳсда қатнашади. Ҳар ҳолда, ЖЧдаги ғалабани ўз юртида нишонлаётган Лео «ПСЖ» ихтиёрига январь ўрталарида қайтади. 37 ёшли Роналду ҳам бунга қадар «Ал-Наср»га анча мослашиб олса керак. Чунончи, клуб йилнинг биринчи ойи ярмигача 3та расмий ўйинда майдонга тушади. Маълумот учун, миллий чемпионат ҳисобидан охирги учрашувини 31 декабрь оқшоми ўтказган Руди Гарсия жамоаси айни пайт 26 очко билан турнир жадвали 1-поғонасида бормоқда.
«Ал-Наср»нинг январь ойидаги ўйинлари
5 январь (пайшанба)
«Ал-Наср» - «Ал-Таи» (чемпионат)
14 январь (шанба)
«Ал-Шабаб» - «Ал-Наср» (чемпионат)
19 январь (пайшанба)
«Ал Наср»|«Ал-Ҳилол» - «ПСЖ» (ўртоқлик)
21 январь (шанба)
«Ал-Наср» - «Ал-ИттифоҚ» (чемпионат)
25 январь (чоршанба)
«Ал-Иттиҳод» - «Ал-Наср» (суперкубок, ярим финал)
Айтганча, «Ал-Наср» шу билан тўхтамоқчи эмас. Саудия Арабистонининг бой клуби январдаёқ яна бир қатор катта трансферларга қўл урмоқчи. El Mundo Deportivo нашри хабарига қараганда, араблар энди «Барселона» фахрийси Серхио Бускетс билан шартнома тузмоқчилар. Табиийки, уни ҳам катта моддий манфаат билан ўз томонларига оғдирмоқчилар. Тўғри, испаниялик ярим ҳимоячининг ўзи араб диёрига йўл олиш вариантига унча жиддий қарамаяпти. Матбуотда олдинроқ «Ал-Наср»нинг Криштиану Роналдудан ташқари, Серхио Рамос ва Н~Голо Канте каби футболчиларни сотиб олмоқчи эканлиги ҳақида ҳам хабарлар тарқалганди.
РОНАЛДУНИНГ «АЛ-НАСР»ДАН ОЛАДИГАН МАОШИ
Йилига - 200 миллион евро (2 триллион 389 миллиард 560 миллион сўм)
Ойига - 16 миллион 670 минг евро (199 миллиард 169 миллион 826 минг сўм)
Ҳафтасига - 3 миллион 850 минг евро (45 миллиард 999 миллион 30 минг сўм)
Кунига - 548 минг евро (6 миллиард 547 миллион 394 минг 400 сўм)
Дақиқасига - 380 евро (4 миллион 540 минг 164 сўм)
Сониясига - 6,35 евро (75 минг 868 сўм)
Дарвоқе...
Роналду эффекти. Диққат, португалиялик юлдуз «Ал-Наср» билан расман шартнома тузгач, клубнинг ижтимоий тармоқлардаги саҳифалари обуначилари сони кунига эмас, соатига ошмоқда. Трансфер эълон қилинганидан сўнг атиги бир неча соат ичида клубнинг расмий саҳифалари обуначилари деярли 3 миллион кишига етди. Умуман, жума куни обуначиларнинг жами сони 860 минг кишини ташкил этган бўлса, бир кунда бу рақам 8,6 миллионга ошди.
